Өлеңдер ✍️

  13.05.2022
  128


Автор: Сайламқан Мұстақиұлы

Сәлем саған, атамекен

Асқар тау, айдын көлді атамекен,
Əн-күй боп көкейіңде жатады екен.
Асыққан арманыңа жеткеніңше,
Əр таңың сағынышпен атады екен.
Қайырмасы:
Сəлем саған, атамекен жері,
Сəлем саған, Қазақстан елі.
Аққудай айдыныңды аңсап келдім,
Сағыныш сазыменен əн сап келдім.
Адасқан бір кездері дауылыңда,
Бір ботаң келді айланып ауылыңа.
Жатсынбай, жатырқамай немереңді,
Бас енді балапандай бауырыңа.
Сыйлапты тағдыр бізге екі мекен,
Туған жер, тұлғасы бір атамекен.
Бөліп тұр екі арасын жалғыз өзен,
Мен қайтып ол өзенді кешіп өтем?
Ат басын атажұртқа бұрдық қайта,
Айтпаймыз «Елім-айды» енді қайта.
Илаһим соңғы көшің осы болсын,
Қара нар қомдалмасын қайта-қайта.
Бабалар арманымен, тілегімен,
Қосылды елге елің, етекке жең.
Атажұрт, арта берсін абыройың,
Болса екен керегең кең, терезең тең.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу