Өлеңдер ✍️

Берен сұлу!
Қыз едің жаны жалын.
Өзгеріпсің көп жылда танымадым.
Кезінде еркетотай бұлғаң қағып,
Іздеп жүр ең жігіттің бағы барын.
Іздеймін деп бағы мен тағы барын,
Ойға алмаушы-ең тауыңның шағыларын.
Арманына өрлікпен жетер болса,
Сен жетер-ең әйелдің қабыланы.
Дәулетінде әкеңнің асып-тасып,
Кербезденіп жүруші-ең алшаң басып.
Қара қызды менсіне бермеуші едің,
Бала кезден өскенмен қолтықтасып.
Ширек ғасыр өтіпті!
Мезгілдің жүйрігін-ай,
Борық бопсың бір кезгі сүйрігім-ай.
Келін болып түсіпсің біздің елге,
Не істерсің Алланың бұйрығына-ай.
Шыққандайын астынан құба белдің,
Абысын боп алдыңнан шыға келдім.
Дәулетті емес, әулетті ағайынмен
Отауыңның жанады шырағы енді.
Берен сұлу!
Тең көрсең де өзіңе көрмесең де,
Үзсең де үзбесең де емешеңді.
Қайнағаң мен қайнымның арқасында
Жолы үлкен деп жүрерсің жеңешеңді.