Өлеңдер ✍️

Уақыт емес,
Біз өтіп барамыз ба?
Сия алмай ұлан-ғайыр даламызға.
Кейбіреулер санда бар, санатта жоқ,
Кейбіреулер аңыз боп арамызда,
Уақыт емес, біз өтіп барамыз ба?
Уақыт емес,
Біз шығар ұтылатын.
Құмсағаттың ішіне жұтылатын.
Күні біту біреуге пайда шығар,
Күнә тартпай дұшпаннан құтылатын.
Дәм таусылса біз шығар ұтылатын.
Уақыт емес,
Біз шығар жоғалатын.
Жастығы, күш-қайраты тоналатын.
Содан ба, қу тірлікте бұйырғаны
Жалқы өмір, жалған дүние саналатын.
Кім болсақ та біз шығар жоғалатын.
Уақытты
Қайтіп алдап соға аламыз?
Өмірде шарқ ұрады шағаламыз.
Кезінде еңбек ет те, ұрпақ қалдыр
Әйтпесе, бір күн ізсіз жоғаламыз.
Уақыттың емін солай таба аламыз.