Өлеңдер ✍️

Нан достарым көп шығар маңайымда,
Сен жан доссың бұйырған талайыма.
Бала кезден бірге өскен Әсирашым,
Ыңғайланып тұратын қолайыма.
Басқалардан ақылы, ары бөлек,
Мен тапсырсам бір істі жанып ерек
Атқарасың адал дос айтпағанмен,
Мен дегенде шығарда жаны бөлек.
Көрген емес алысқа салып ірге,
Не қиындық көрсем де болып бірге
Қатарласып келесің томпаң қағып,
Жолың бөлек болғанмен, жаның бірге.
Сен – Шығыста бұл күнде, мен – Арқада,
Мезгілді біз салғанмен кең арқаға.
Кеше ғана қыз едік Алматыда,
Өмір шіркін келіпті бел ортаға.
Қалмаймыз деп заманның керуенінен,
Тіршіліктің маясы желгенімен,
Көңіліміз әлі де қыз-дәуренде,
Төлқұжатта елуге келгенімен.