Өлеңдер ✍️

Көбелектің ғұмыры бір-ақ күндік.
Сол шындықты жүз жылда бір-ақ білдік.
Таңда берген жас жанын кешінде алған
Жаратқаннан бір медет сұрап тұрдық.
Қуыршақтан бөлініп таң нұрымен,
Таласады бір күндік тағдырымен.
Ұшып бара жатады табиғаттың
Дауылымен жарысып, жаңбырымен.
Жұқа, нәзік қос қанат дамыл алмай,
Ұшып бара жатады жаны қалмай.
Гүлден-гүлге қонады,
Ғашықтықтан
Байғұс жүрек болады жарылардай.
Ғашық жүрек, өмірге ділгір еді...
Қысқа ғұмыр арманын кім біледі.
Бір-ақ күнде туылып, ұрпақ салып,
Ұшып жүріп дүние-ай үлгереді.
Жалғыз күндік өмірді жалғайын деп,
Жанталасып, ұрпақсыз қалмайын деп.
Жанұшырған байғұсты ақын отыр
Жырға қосып, құқығын қорғайын деп.