Өлеңдер ✍️

  13.05.2022
  124


Автор: Сәуле Досжанова

Өмір өзені

Кеше ғана қыз едім қылығы бал,
Ортаны іздеп жүретін жыр ұғынар.
Өлеңқұмар жанымды байқап қалып,
Қағып түсті бір жігіт құрығы бар.
Содан кейін жар болдым, бала сүйдім.
Ағайынды қадірлеп жаны ашитын,
Берекесі мол болып дастарханым
Бәйбішесі атандым тамаша үйдің.
Кеше ғана отызда көркем едім,
Қылығыммен жарымды өртеп едім.
Зәкір салған бақыттың теңізіне
Жұбайымның көтерген желкені едім.
Шашымды өріп, күмістеп самайымды,
Ұрпағыммен көбейтіп маңайымды.
Өмір-өзен ағады өлеңіммен,
Биіктетіп көңілде сарайымды.
Кеше ғана қырықта емес па едім,
Қызыл-жасыл артта қап белестерім.
Көрінеді бүгінде қоңыр бел боп
Алдымдағы толқынның елестері.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу