Өлеңдер ✍️

  13.05.2022
  203


Автор: Сәуле Досжанова

Ұлар

Алтай менен Ұлытау аспанында,
Ақар-шақар таулардың асқарында
«Ұлар» деген текті құс болады екен
Жырға қосқан батырлар дастанында.
Ақар-шақар таулардың ұшағында,
Ақша бұлтты аспанның құшағында.
«Ұлар» деген ұлы құс болады екен
Аңшылардың түспейтін тұзағына.
Құмар аңшы қояр ма жолға түссе,
Қапияда бекзат құс қолға түссе
Адал, асқақ, тәкәппар қалыбында
Өледі екен тұншығып торға түссе.
Асқар таудың басында тобырымен,
Ұлар шулап ән салса қоңыр үнмен.
Арғы бетте елді аңсап ағайындар
Егіліпті жүректің тамырымен.
Өр Алтайдың басында ұлары бар,
Тарқамайтын еліне құмары бар
Сол ағайын оралды туған жұртқа
Тырнағынан ұлардың тұмары бар.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу