Өлеңдер ✍️

«Ұл тудым!»,- деп асқақтанып еңсем де,
«Ұл тапты»,- деп қалжа жегем мен сенде.
Сынғаныңды көрсетпегін ұланым,
Сәл шегініп қалғаныңды көрсем де.
«Ұл тапты!»,- деп аспандатып өңірі,
«Ұл таптым!»,- деп тебіренді анаң көңілі.
Күресіңді көрсем екен, көрмейін
Жүргеніңді іздеп өмір жеңілін.
Тағдырында не көрмеген халықпыз,
Небір қырғын-жойқындардан қалыппыз.
Содан ба екен, туған жерді қорғайтын
Алдыменен ұл тілеген ғаріппіз.
Ұл тілеген ұлттың туын көтерер,
Ұл тілеген жауға нөсер төпелер.
Алдаспанның басы астында жатқанда
Ұл тілеген кеткен кекті әперер.
Содан қалған,
«Ұл »дегенде ұланым,
Жарқырайды отбасының шырағы.
Тілегіне лайық боп халықтың,
Көтеріп жүр Отаныңның ұранын.