Өлеңдер ✍️

Жаралы жылда,
Қаралы оттың басында.
Ішінен тынып,
Бауырын жоқтап ашына.
Өсіпті анам.
Жанына батып,
Соғыстың татып у дәмін.
Ұзатылыпты,
Гүлдемей, солып жасынан...
Отымен кіріп,
Күлімен шығып үйінің.
Береке қылып,
Еңбекпен тапқан тиынын.
Өтіпті анам.
Пейілі теңіз,
Мейірі көл боп өмірден
Бабаларының
Аруақтарына сыйынып.
Жұтаңдау үйде,
Қатаңдау тірлік кешіріп,
Сабырмен жүріп,
Сырын да ашпай шешіліп,
Кетіпті анам
Жоғынан бар ғып,
Барынан нар ғып өмірді.
Жаратқан берген
Жалғыз қарғасын өсіріп.
Тарихы осы,
Тәңірдің жазған маңдайға,
Қайтеді енді,
Тағдырды пенде таңдай ма?
Атқан бір оқтай,
Шапқан бір аттай шықты өте,
Ащысы басым,
Тәттіге мейір қанбай ғап...