Өлеңдер ✍️

  13.05.2022
  292


Автор: Сәуле Досжанова

Үнсіз махаббат

Екеуміз екі қиырдан,
Кездесіп қалдық ойда жоқ.
Жүректерге кеп құйылған,
Жалындап сол сәт бойдағы от.
Тағдырға жаным, мың тәубе,
Бақытқа осы тап келіп,
Жанардан ұшқан нұрсәуле
Жанарға барып жатты еріп.
Көздермен ғана ұғыстық,
Сөздердің болмай керегі.
Тұлабойымызда ып-ыстық
Ғажайып сезім өреді.
Сезімі судай тасыған,
Ұғысқан көзбен, үні жоқ.
Махаббат деген осы ма,
Ғашықтар үшін тілі жоқ.
Екеуміз тілсіз, түнгі әлем
Біз үшін жатты сырласып.
Жүректерді үнсіз тыңдап ем.
Жаныма кетті ұласып.
Екеуміз.
Үнсіз махаббат...
Дүние-ай, қандай тәтті еді.
Көзіңнен ұшқан шапағат
Балқытып бойды, жатты еріп...




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу