Өлеңдер ✍️

  13.05.2022
  100


Автор: Сәуле Досжанова

Бұл кітап саған арналған

Ақтарған барлық арманын,
Кітапты саған арнадым.
Ондағы жырлар сондай-ды,
Сезімді ғажап қозғайды.
Оқыған адам тебіреніп,
Сүйгенін ойлар еміреніп.
Көңіліне жыр-құс қонады,
Мен құсап ғашық болады.
Жап-жарық болып бар маңы,
Ап-анық болып арманы,
Жер құсап Күнді айналып,
Өзінен өзі байланып.
Қасында жүріп сағынар,
Не көрсетсе де бағынар.
Тұлабой тоңып-жанады,
Содан да рахат табады.
Табыла бермес жер-көктен,
Адамды билеп, тербеткен,
Махаббат деген сұмдықты,
Мойындап ащы шындықты
Ақтарып жазған сырларды,
Жаттайды осы жырларды.
Әр шумағынан төгіліп,
Елес боп бейнең көрініп,
Аққудай жүзген жарасып,
Қызығып жұрттар қарасын.
Жан жүрегімен езілген,
Үлгі алсын біздік сезімнен.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу