Өлеңдер ✍️

  13.05.2022
  115


Автор: Сәуле Досжанова

Жыр тұмар

Мен бір жыр жазсам шіркін, бойтұмардай
Естігеннің жаны еріп, ой туардай.
Сезімі ғашықтардың бір-біріне
Тек қана сол өлеңмен айтылардай.
Сол жырмен намыс, арды биіктетіп,
Көрсетсем адал жанды сүйікті етіп.
Махаббат, парасаттың қасиеті
Тұмар боп тұрса соған сыйып кетіп.
Бір рет тыңдағанның көңілінен
Кетпесе, үнсіз ерсе әміріне.
Адамдық, адалдықтың ақ жолында
Шырақтай жанып тұрса өміріне.
Осылай жазсам, шіркін, деп келемін,
Жан менен жырдың жасап жекпе-жегін.
Жырқұмар оқырманның жүрегіне
Тұмардай түйілсе деп отты өлеңім.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу