Өлеңдер ✍️

Генерал Сәт Тоқпақбаевқа
Сізді көрсем,
Жақын, ізгі
Сезім болып тербеледі көгенде ой.
«Сәт»,- деп қойып атыңызды,
Өміріңіз сәтті болсын деген ғой.
Сәтті болып жүрсінші деп әр ісі,
Ата-анаңыз ұлы тілек тілепті.
Сәттілік пен жақсылық кеп жарасып,
Ер болдыңыз арыстандай жүректі.
Әулетке емес, ұлтқа ұл болған баласыз,
Өтті ме әке барыңызды мият қып?!
Керек жерде кесіп айтып саласыз,
Ұлтыңыздың алдаспаны сияқты.
Алла Сізді қазағыма бергендей
Қорған болып жүрсінші деп жан салып.
Сізді көрген, хас батырды көргендей,
Тұлғаңызға қарап қалар тамсанып.
Сізді көрсем, бауырымдай еркелеп,
Бір жақсылық жасағым кеп кетеді.
Алматының жауынындай ертелеп
Жібек сезім өткінші боп өтеді.
Сізді көрсем, ағатай - жақын, ізгі
Сезім болып тербеледі көгенде ой.
«Сәт»,- деп қойып атыңызды,
Өміріңіз сәтті болсын деген ғой!