Өлеңдер ✍️

Бірде демін тартқандай, біресе үріп,
шәлкес мінез самал-жел тұр есіріп.
Қуғын көрген ала бұлт тыным таппас,
Айдың шамын бір жағып, бір өшіріп.
Бір өзі елден ерек құлшынып ап,
арықта тынбай жатыр су шуылдап.
Көктегі сирек жұлдыз көбейеді,
аспандап өте берсе «ТУ» суылдап.
Жас шыбық жас көңілдей алабұртар,
көрінер ауыл-аймақ алабы тар.
Күндізгі көлеміне көлем қосып,
алыста тұрған қора қарауытар...
Көктем, көктем, тым жап-жас, аңғал әлі,
осы бір сәт, осы сәт жанға жайлы.
...Мен сыртта жүріңкіреп қалсам керек,
қайда болдың деп жарым таңғалады.