Өлеңдер ✍️

Мұнда ылғи тек бойжеткендер,
ержеткендер тұрады.
Мұнда жүрген жігіт көзі,
қыздың көзі қырағы.
КазГУ болсын, ЖенПИ болсын,
қайда болсын, бәрібір,
жатақхана, жатақхана –
жастық шақтың пырағы.
Мұнда іңгәлап жылайтұғын
бала деген болмайды.
Кемпір-шал да кездеспейді,
(бірақ, болмас ол қайғы).
КазГУ болсын, ЖенПИ болсын,
барлығында бас қосып,
жатақхана, жатақхана –
жастық шақты толғайды.
Кел, кел мұнда, болсаң егер
махаббаттан үміткер,
жатақхана үйлерінен
қыздарды көр, жігіттер!
Мықты болсаң, қыздарының
жүректерін жұлып көр,
әлсіз болсаң, қыздарына
жүрегіңді жұлып бер!