Өлеңдер ✍️

Көк ормандай көк поезды тақымдап,
көктен мына уақыттан ақымды ап,
жүйрік, ұшқыр дөңгелектерге ән салғызып,
сағат сайын келем саған жақындап.
Саған қарай келем жүйткіп күн ұзақ,
саған қарай келем жүйткіп түн ұзақ.
Жете алмастан келем, бірақ сонда да,
кеткен екем байқамастан тым ұзап.
Бір өзіңе
болып барлық аңсарым,
бір өзіңсіз
тірлік кештім қанша күн;
Сені ойлаумен
өтті барлық ымыртым,
сені ойлаумен
өтті барлық таң сәрім.
Келем жүйткіп жандай-ақ бір арманда,
сен дегенде менде дегбір қалған ба,
жүрегімді жұлқып үнсіз суырған,
сағынышым,
таусылмайтын жалғанда!