Өлеңдер ✍️

Тумасаң да
туғандайсың, Бәтима,
жаңа толып
туған айсың, Бәтима.
Көкірегіңе көп
жақсылық жиып ап,
жамандықты
қуғандайсың, Бәтима.
Үлкен емес, кіші де емес,
ірісің,
кісілікті
қуған жанның бірісің,
Адам-ата
жаралғалы байсалды,
келе жатқан
секілді бұл жүрісің.
Келін-кепшік,
бала-шағаға үлгісің.
Жеңгей де емес,
келін де емес-құрбымсың.
Жаралғандай
табиғаттың өзінен,
құбылмастан
күліп қана тұр мүсін.
Екі иықты
көрген жоқсың жауыр ғып,
қыңқ етпейсің
болсын мейлі ауырлық
Бәтиманы
Бәтима етіп тұрған
Ешкімде жоқ бауырмалдық
бауырлық!