Өлеңдер ✍️

Құр малданып өмір дейтін бес күнді,
шын ақындар алдамайды ешкімді.
Алдамайды, әсіресе, қыздарды,
құбылтпайды өйтіп олар кескінді.
Жаратылған соң, о бастан ақ таң боп,
жатар жалпақ елге мынау мақтан боп,
қасқырлар көп
қой терісін жамылған,
арсыздар көп,
ақын атын сатқан көп.
Сенбейсің бе,
сүйме де оны, сүйдірме,
басына әкеп, бірақ бәле үйдірме.
күйіп оның
жүргені онсыз да аз емес,
күйдірме, қыз, сен де енді күйдірме.
Күндей нұрлы күліп қана шығатын,
жан іздейді ол,
жанын, сырын ұғатын.
Күліп-күліп сен жүргенде иланбай,
күйіп-күйіп,
өтіп кетер шын ақын...