Өлеңдер ✍️

Бір өлең өлмейтұғын жазсам ба екен,
сөйтіп бұл заманадан озсам ба екен.
Ол өлең болад деуші ед ай қасында,
қолымды көктегі айға созсам ба екен.
Асығыс қоштасып ем бала шақпен,
жастық шақ азабын да дара шеккем.
Ай туып,елі жатып,қызы күткен,
бірігіп кетсем бе екен болашақпен.
Мен солай күндерге алыс кетсем бе екен,
жұрт өтпес өткелдерден өтсем бе екен.
Ашылып қанша ғасыр қақпасы алдан,
жұрт жетпес жерлерге де жетсем бе екен.
Бір мендік бақыт-бақты танып қалып,
тоқтаса көздің жасы тамып барып.
Бір шумақ өлең болып қағаздағы
құласам қиянға сол талып барып...
Бір өлең өлмейтұғын жазсам ба екен,
сөйтіп бір күннен қанша озсам ба екен.
Ол өлең болад деуші ед ай қасында,
қолымды көктегі айға созсам ба екен?!