Өлеңдер ✍️

Түнгі аспаннан от боп, шоқ боп тамардай,
жарқыраса ұласып жаз таңына,
жерде жүрген жұрттан дос-жар таба алмай,
серік еттім жұлдыздарды жаныма.
Сендерді аңсап түндерге әрең жетемін,
бізді бөлер қанша күн бар, күндіз бар.
Мен сендерсіз жүнжіп, жүдеп кетемін,
сөне көрме, жарқыраған жұлдыздар?!
Төбесінен оттар самсап көп төнген,
құмар болсам көк тіреген шың-құзға,
күнім бітіп,
бұл дүниеден өткенде,
мен де, бәлкім, айналармын жұлдызға.
Көкірегіме мәңгі үзілмес ән қонып,
сонда лаулап құс жолына жетермін.
Жерден опа таппаған соң жан болып,
анық боп тұр бір жаққа ұшып кетерім...