Өлеңдер ✍️

  11.05.2022
  132


Автор: Жүрсін Ерман

Жамбылдың жаңа ескерткіші

Ескерткішің жаңарды.
Өзің-ескі.
Даңқыңа да дүдәмал сөз ілесті.
Тойларыңа өңмендеп ұмтыламыз,
Ойларыңнан жүрсек те безіп есті.
Ақын едік – қызулау қаны бірге,
Ақындардың өтеді зары кімге.
Саған тиген сөзден мен жараланам,
Ал өзіңе, шынымен, бәрі бір ме?
Алатаудай байсалды ақ бас аға,
Селт етпейсің мақтаса.
Даттаса да.
Қуанбайсың сөзіңді ел жаттаса да,
Қайғырмайсың – қисынсыз оттаса да.
Қозғалмайсың орныңнан бір отырған,
Айнымайсың ақындық мұратыңнан.
Жүрегінің басынан қан ақпайтын
Артық білем тас ақын – тірі ақыннан.
Күнәсізге мені жұрт қоспайды анық,
Бас қатырып жүргенше босқа ойланып,
Баса киіп бөркімді, тәуекел деп,
Кетсем бе екен тезірек тасқа айналып?




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу