Өлеңдер ✍️

Тәңірім ең, далам-ай, тектім едің,
Тұлпарларың озса екен деп тіледім.
Өзің жайлы тәтті ойым – сәтті ойымды,
Темірқалам ұшында кептіремін.
«Мен қаласыз бір тәулік тұра алмаймын» –
Деп өзімді күніне бір алдаймын.
Бірақ далам, ойымда сен жүресің
Жолын тосып тұрсам да трамвайдың.
Тапжылмаудың тапқандай мен бір емін,
Сезімімді төзімге жеңдіремін.
Тегеурінім – темірдей,
Қаттымын деп,
Берікпін деп өзімді сендіремін.
Түскен темір тәртіпке өмір бекем,
Ойлар келіп-кетсе де небір бөтен.
Мызғымаймын мен бірақ, өз үйімнің,
Қабырғасы секілді темір-бетон.
Төңіректе дуылдап өмір-дүкен,
Басқа ойларды басымнан мен үркітем.
Тереземнің алдында – темір қалбыр,
Темір қалбыр ішінде – теміртікен.
Темір жайлы жаза алмай темір өлең,
Тереземнің түбінде тебіренем.
Темір емес жүрегім, содан шығар –
Теміртікен гүліне еміренем!