Өлеңдер ✍️

Қуанбаймын бұл күні
Қосылады деп жасқа-жас:
Мәңгіліктің мылтығы
Мені бейғам тастамас.
Азайғандай аптығым,
Басылғандай ыстығым.
Шөлге айналып шаттығым
Көңіліме түсті мұң.
Қасіреттің көгенін
Қайратым жоқ елемес.
Күліп тұрмын дегенім
Жылағаннан кем емес.
Өміріңді жалмаймын
деп сағатым зырлайды
Қуана да алмаймын
Ішті тесіп бір қайғы.
Уыты бар көңілде
Жазылмайтын жараның:
Неге келдім өмірге?
Неге кетіп барамын?
Шықтым жұрттан жалығып,
Мазаң болды мінезім.
Жер бетінде жабығып
Жүргендеймін бір өзім...
Қызуы жоқ жардың да,
Қызығы жоқ малдың да.
Мақсатым жоқ алдымда
Ұқсаймын ба малғұнға...
Ұзап бара жатқандай
Келешектің кемесі.
Удың дәмін татқандай
Уылжимын.
О несі?!