Өлеңдер ✍️

Табам ба деп ыңғайын бір ұлықтың
Ұрынбайтын жұмысқа ұрыныппын.
Өзімді-өзім салдым да қияметке,
Іріліктің
Иілмес сырын ұқтым.
Міндетке алып қас-қабақ күзетуді
Доғарып ем қисығын түзетуді,
Борышың деп, бәтшағар, біледі екен
Үлкен ғой деп жасаған ізетіңді.
Ибаңды да ұғынбай, иманыңды,
Тарыдайын қауызға сыйғаныңды
Құлдық ұрып тұрғаның дейді екен-ау
Қонақ қой деп,
қолға су құйғаныңды.
Көкіректі тұрғанмен өлең кернеп
Миғұлаға болдым ба мен енді ермек?
Бір шұлғысаң басыңды
Сол ақымақ
Ойлайды екен өзін бір кемеңгер деп.
Атасының басы.
Енді құнықпаспын!
Ұлығың да құдайын ұмытпасын.
Сен де мені кеше гөр –
Төрелердің
Төбесінен түсірме ұлық басым!