Өлеңдер ✍️

Ұлытаудың ұраны – ұлар, ұлар,
Ұлары жоқ,
Бұл таудың мұнары бар.
Ұлы тастың алдында ұяттымыз, –
Кім ауырар ұяттан, кім арылар?!
Ұлытауға бардың ба? Ұлар қайда?
Ұлы қайғың уылжып тұнар бойда.
Ұры тісің секілді у сезімің
Уын жайып уілдеп тұрар ма ойда...
Арқар ауып кеткен соң, ұлар ұшып,
Қолға түспей қасқыр да қылар ішік,
Кілең темір құрсанған құрбыларым
Киігімен даланың жүр алысып.
Ұлытаудың ұлдары-ау, Ұлытаудың,
Құлағыңа жете ме үні таудың?
Ұлар қашқан күндерді ұмыт, аулым,
Үнжырғасы түспесін ұлы таудың!
Ұлытауым, ұлығым,
Ұлтым менің,
Ұран ілер басына бұлт ілмеген.
Ұларыңды ойлама, ұлыңды ойла,
Бауыры бүтін бар дейсің бұл күнде кім,
Ұлытауым, ұлығым, ұлтым менің!