Өлеңдер ✍️

Ақиқат болса имес жырға кім бас,
Емес бұл жерлестікке ұрғаным бас.
Ағаның қасиетін ұғу үшін
Жігітке керек сендей бір қарындас!
Білеміз, сені осылай кім баптаған,
Кісілік бесігінде құндақтаған.
Тектілік болмысымды ұмыттырмас
Осынау өжет қалпың қымбат маған!
Өзіңді сарқып құйсаң ойлы өлеңге
Сөзіңе қызығамын кейде мен де.
Таптайсың маубастарды табаныңмен
Сүйектен өткізесің сөйлегенде!
Жүрсең де шытынатып жан шынысын,
Қазақтың баулыған сен әнші құсын.
Отан деп отқа түсер көбелексің,
Заманның Әлия мен Мәншүгісің!
Мен сені ширек ғасыр тыңдап келем,
Жеткіздім пейілімді бұл хатпенен.
Қазақтың бар қызының қасиеті
Тұр сенің есіміңде Қымбат деген!