Өлеңдер ✍️

  10.05.2022
  105


Автор: Жүрсін Ерман

Мырзатай Жолдасбековке

Қасиеттеп тірісінде тіріңді,
Іріні – ірі,
Пір деу керек – піріңді
Құбыласын түгендеген қазаққа
Өзіңіздей керек екен бір Үлгі.
Нұрын шашып ойға, қырға, Сырға да
Тоба дейік – ортамызда жүр ме аға.
Өз деміне даңдайсыған қоғамға
Тоқтау айтар керек Сіздей бір Дана.
Күлтегіннің кие қонған жұртында
Күлтегін деп ат қоймайды жұрт ұлға.
Бабаларды ұмыттырмай жүретін
Керек бізге өзіңіздей бір Тұлға.
Қасиетім – жыр-ата мен жыр-ана,
Марқаямыз айтыс дейтін мұраға.
Сол мұраның шырақшысы секілді
Ортамызда жүру керек бір Аға.
Ескі жайлы естілерден сұраңыз,
Түлемей ме сонда тарих, жыр, аңыз.
Сүйінбайды, Жамбыл менен Кененді
Қастерлейтін керек бізге бір Абыз.
Қоламтадан шоқ шықпай ма үрлесең,
Қыл шылбыр да күрмелей ме – күрмесең.
Кісіліктің қасиетін дәлелдер
Керек бізге өзіңіздей бір Көсем.
Қамырықсам – көңілімде тұрды атың,
Өкпелейді өзек жарған жырға кім.
Еліңе-ес,
Еріңе-сес болатын
Бұл заманға қажет Сіздей бір Хакім!
Бір бақыт қой Сізден саулық сұрасу,
Бір бақыт қой Сізге барып сыр ашу.
Жолға шықсам, жолымда ылғи тұрса екен
Жолдасбеков деген биік бір Асу!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу