Өлеңдер ✍️

Ұнамайды дедің де басқа қала,
Шәрбануым, кеттің-ау Астанаға.
Гумилевтің Еуразия университеті
Қол созым жер сен тұрар баспанаға.
Алматы еді мен саған ұсынғаным,
Ол шаһарға оншама ұмсынбадың.
Ақордаға көңілің ауып кетті,
Алай-дүлей қысынан қысылмадың.
Мінезіңді хош көрдім жасқанбаған,
Апаңменен екеуің саспаң, балам.
Миллионер атанды Астана-ару,
Ер Төстіктей күн санап өскен қалаң.
Өсерсіңдер сендер де, өнерсіңдер,
Елмен бірге бәрін де көрерсіңдер.
Туған жерді киелі сағынғанда,
Анда-санда ауылға келерсіңдер.
Астанаға әкең де ғашық болған,
Баруға әркез ынтығып асық болған.
Баяғыдан бойдағы қасиетім-
Биіктерге самғауға машықтанған.
Ақтау-әсем, жұмақтың төрі сынды,
Асау теңіз –періште-пері сынды.
Астанаға құлшынып сонда-дағы
Кеңге жайғым келеді өрісімді.
Ел дегенде билесе мені сезім,
Астананы ойлаймын тегі өзім.
Астанада баянды болашақ бар,
Астанада қос қызым-екі көзім.
Ақ Шәрбөктің дәл бүгін туған күні,
Таусылмасын тірліктің думан-жыры.
Ақ Раушан апаңмен, достарыңмен,
Ақтарылсын ақ пейіл, сыр сындығы.
Балап сені, балапан, нақ асылға,
Қуанышқа бөгіп жүр анашың да.
Ыстық сәлем жолдайды әкең сенің,
Құйттай болған кенжетай баласына.
Сәбидейсің сен бүгін шырылдаған,
Бал кейпіңнен айныма, гүлім,балам.
Бақытты бол, баянды,берекелі,
Тәңір ұзақ сыйласын ғұмыр саған!