Өлеңдер ✍️

Тағдыры қанша сілкісін, табаны таймай тірескен,
Тағдырды жеңе білетін батырдай бейне күрескер:
Тағылым небір көкейге түйгізер дара тарланым,
Тұлғаңды сенің көргенде оянып рух, жыр ескен.
Кей-кейде құрық салса да, қытымыр мінез бұл өмір,
Бұйырған жалғыз тірліктің бағасын дәйім біле біл.
Ғайыптан тайып басыңа күн түсе қалған сәтінде,
Беу ,бауырым,Ғани Кариндей баянды ғұмыр сүре біл.
Қайтеміз тегі, болған іс, басқаны тегі айыптай,
Өткенге көзді саламыз, ақылмен пішіп байыптай.
Тіл тиген Сізге, Ғанеке, жарқылдап тұрған алмас ең,
Бір кезде сонау тіл тиген Ғани Мұратбаевтай.
Ер едің сен де сиынған көктегі Тәңір-бабаңа,
Құдайым құйған ақыл-ой, парасат, білім санаңа.
Өзіңді-өзің тізгіндеп, өжеттік мінез таныттың,
Бағындырып жетпіс шың, ұқсайсың енді данаға.
Даналық деген –кісілік, адами болмыс –қалпыңыз,
Тура жолменен жүргесін артады дәйім нарқыңыз.
Адамгершілік пен ізгілік, қайырымдылықты ту еткен,
Сіздейін атпал ерлерді құрметтей білер халқымыз.
Ағаға ізет, ініге ілтипат қылған нар мүсін,
Азаматтығыңды айшықтар абырой жиған арлы ісің.
Жетпісің құтты, еліңмен марқая бергін той тойлап,
Жарасты ғұмыр кеше бер жеңгеймен асыл – бақ құсың!