Өлеңдер ✍️

Бабамның маған мәлім мықты екені,
Баһадүр, жүрегінің түкті екені.
Өзалдан Алтай, Арқа, Алатауым,
Сыр бойы, Орта Азия, Маңғыстауым,
Қазақтың қасиетті құт мекені!
Бұмындай ел қағаны тарпаңдарым,
Азуы алты қарыс арландарым.
Тулақтай жерді қимай жат-дұшпанға,
Халқының кие тұтқан армандарын.
Естеми, Білгі қаған,Күлтегінім,
Тоныкөк...
тарихқа ауып тұр көңілім.
Нәр алған тамырымыз түркі жұрттан,
Білемін бір екенін түр-тегінің.

Күн кешіп баба дәстүр, дәп-ғұрыппен,
Өр ұлан, айнымағын тектіліктен.
Ешкімнен айыл жимас жауынгер ел-
Бәріміз тараламыз Көктүріктен!
Бабалар кешкен жорық-жасын ғұмыр,
Демеймін өткенді ойлап жасыңды үйір.
Заманның алмағайып кезеңінде,
Түркілер, біріктірші басыңды бір!
Жүректе жанып алау жалындасын,
Қамалдың біз білмейміз алынбасын.
Түркінің ұстап қара шаңырағын,
Қазағым, ұлы Жібек жолындасың!
Қазағым – Көктүріктің ұлы Отаны,
Сондықтан түркі жұрты ұнатады.
Қайтадан туын тіксін төрімізге,
Баяғы Түркілердің ұлы Одағы!
Білгенге болмау керек талас мұнда,
Ешкімнің емес ешкім қол астында.
Тек қана бірлік керек беу, түркілер,
Білсеңіз, жау жоқ деме, жар астында!
Сиынып құдіретіне бабамыздың,
Жыр еттік ұлылығын Даламыздың.
Тұлпарлар тұяғының жаңғырығы,
Жақпарын жаңғыртқанда санамыздың!..
Түріктер!
Көктүріктер!
Көп түріктер!
Өшпесін бойыңдағы тектілік өр!
Тілі, ділі, діні бір зәузатыңа,
О, Бабам, аруақты, отты рух бер!