👈 қаріп өлшемі 👉

  Өлеңдер ✍️

  07.05.2022
  47


Автор: Қорғанбек Аманжолов

Қолда, Құдай, түрік ұлын!

Қара теңіз шайқалады,
Айтар әні толқын атып.
Ақ теңізім қайталады
Сол бір күйді буырқантып.
Қара теңіз шайқалады,
Хабар күтіп Каспий жақтан.
Алақанға ай толады
Толқын-арман тасқындатқан.
Босфор бұғаз айдынында
Махаббаттың мүйістері.
Қалар сіңіп қайығында
Қолаң шаштың иістері.
Ыстамболдың мың жұмбағы –
Топқапының сарайында.
Албыраған жер жұмағы –
Малынған таң арайында.
Әйәй София, Ахмет Сұлтан
Айға асылған мұнарасы.
Қос теңізден қосылған ән
Тыным таппас түн баласы.
Анкарада асқақтадық,
Кие көрдік Коньядан.
Әли бейім бастап барып,
Кәрдаштарым жанын жайған.
Дәулат – екеу, миллетің бір,
Бір ененің құлынындай.
Қазағыңа құрметің дүр
Бауыр ықылас шырынындай.
Тәркі болмас түркі дүние,
Жаса, жұрты Ер Тоғрылдың.
Арманы – асқақ, рухы – кие,
Қолда, құдай, Түрік ұлын!


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы