Өлеңдер ✍️

  07.05.2022
  90


Автор: Қорғанбек Аманжолов

Наза

Алаштың ардагер арысы Нəзір Төреқұлов маздақ
ғұмырының соңғы он жылында туған ел-жұртынан аластатылып, алыстағы Сауд Арабиясындағы елшілік қызметке
жер аударылған болатын. Зымыстан Мəскеу қайта
шақыртқанда алдағы аранды сезген қайран боздақтың
көкірегінің арман-құсасы былайша ақтарылмады деймісіз?!
Буыршын тектес ұл едім
Бұйдасын үзген жасынан.
Сезсе де сұмдық жүрегім,
Сескеніп әлі жасыман.
Алаштай елдің түлегі ем,
Әзелден көзін ашпаған.
Ақсұңқар құстай түлеп ем,
Азаттық аңсар бастап ән.
Шаңқылдап қия биіктен,
Тастүлек сынды
тіл қаттым.
Дермене дертті күйікпен
Мұратын діттеп милләттің.
Әлихан, Ахмет бастатқан
Боздақтар асыл бар еді.
Табандарына тас батқан,
Шетінен қара нар еді.
Жыртысын жыртқан жұртының
Өрт Намыс, Алау Ар еді.
Өшірген сондай нұр-күнін
Дүние неткен тар еді.
Ту еткен зарлық күнінде
Кенесары ханның арманын,
Тұңғиық түнек түбінде –
Мағжандай інжу-маржаным.
Қазақты салған құлыпқа
Дүлей бір дүние-жалған-ай.
Мөңіретіп алып тұлыпқа,
Арзымай қалған арман-ай.
Бостандық алдық дегенде –
Қайтадан түстік боданға.
Халықтың қамын жегенде –
Қас болып шықтық қоғамға.
Ту сыртын берген қырындап,
Тасбақа тағдыр қастығы-ай.
Мұрты мен ұрты жыбырлап,
Биледі бізді тас құдай!
Алланың нұрын көрсетпей,
Меккенің жолы жабылған.
Иманын жолдас, көрші етпей,
Сталин-пұтқа табынған.
Талықтырса да тар тұрақ,
Ұлтымның зарын тыңдадым.
Кеудеде Күнім жарқырап,
Ғаделет іздеп, тынбадым.
Расул Аллаһтың елінде
Елші де болған жылдарым.
Қасиетті Қаһба төрінде
Төгілді талай мұңдарым.
Түнекте жатыр өз елім,
Алладан Рахман – алыста.
Үзбестен үміт
Төземін,
Тігемін көзді ғарышқа.
Арабстанның көгінен
Жанымды жалын шарпыды.
Елімді ойлап,
Егілген
Аңсарлы азап әр түні.
Киелі түбек, арабы ел,
Алладан аян түсірген.
Арманым,өшпей жана гөр,
Тілеймін таупиқ ішімнен.
Шапағат сырға кенелдім,
Көңілде сол бір медетім.
Нығметке мен де бөлендім –
Темірқазығым сол сенетін.
Аждаһа Мәскеу шақырған,
Сұм жүрек, шіркін, сезеді.
Аранын ашып ақырған,
Ажалдың келді-ау кезегі.
Бұлағай дәурен бұлтарған,
Бақытты енді таба алман.
Жұлдыздай ағып жұртымнан,
Шәһиті болсам жоқ арман!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу