Өлеңдер ✍️

Мен сенің ұнатамын күлісіңді,
Сырнайлы, сыңғырлаған күміс үнді,
Көктемнің үлбіреген гүлі сынды, –
Сиқыры бар ашатын тынысымды,
Мен сенің ұнатамын күлісіңді!..
Назданған қылығыңды ұнатамын,
Мұңайсам жанымды сол жұбатарым;
Еркелеп атқандай бір бұла таңым,
Бөленіп шуағыңа бүр атамын,
Назданған қылығыңды ұнатамын!..
 Ұнатамын қиылып қарасыңды,
Тұрғандай сыйлап маған бар асылды;
Шықпаған тілі де әлі бала сынды, –
Тек қана, жаным, саған жарасымды,
Ұнатамын қиылып қарасыңды!..