👈 қаріп өлшемі 👉

  Өлеңдер ✍️

  03.03.2022
  80


Автор: Абдрахман Асылбек

Ел мақтанышы

(Бокстан Еуропа чемпионы болған Серік Қонақбаевқа)

Мақтасақ біз мақтайық та Серікті,
Жігіт болып жаратылған көрікті.
Ақыл, қайрат, сыр мен сымбат, мейірім –
Бәрін бірдей бір басына беріпті.
Тәубасына келтіріп көп «мықтыңды»,
Шаршы алаңда шайқасқанын ықтырды.
Бокс деген емес тіпті төбелес,
Үлкен өнер екендігін ұқтырды.
Жазық маңдай, қара мұртты қияқты,
Сұлу тұлға тұлпардайын тұяқты.
Қарсыласын құлатуды көздемей,
Шаршы алаңда билеп жүрген сияқты.
Көрсең аңдап жан дүние пейілін,
Тұла бойы тұнып тұрған мейірім.
Жан біткенге жарастықты ұсынып,
Бір өзіне аударды әлем зейінін.
Қашанда ол сабырлы бір қалыпты,
Сонысымен тәнті қылған халықты.
Қарсыластың соққыларын дарытпай,
Асқан шебер екендігін танытты.
Жұлқынатын жолбарыстай жаралы,
Қара ниет жауыз жандар бар әлі.
Қарсыласы ұмтылса жеп қоярдай,
Серік оны күліп қарсы алады.
Мен осындай ерлеріме мақтанам,
Оның әрбір жеңісіне шаттанам.
Жасай берсін Серік сынды жігіттер,
Ел намысын, ел бірлігін сақтаған.


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы