Өлеңдер ✍️

Аспаннан құлаған аппақ қардан,
Үзіліп, жоғалған соқпақтардан,
Бұрқырап ұшып кеткен бақбақтардан,
Уақыттан іркіліп, тоқтап қалған
Бір өлең өріп берейін бе?
Оянбай көз ілген шақтарымнан,
Жалындап алқызыл оттарымнан,
Өртеніп шылымның шоқтарынан,
Құрбан боп жаулардың оқтарынан,
Сен үшін өліп көрейін бе?
Нұр алып ұшқыны жоқ шырақтардан,
Мұң алып ұсқыны жоқ сұрақтардан,
Өміріңнен түңіліп тұрақталған,
Көңіліңе үңіліп сыр ақтарған,
Бейнемді есіңе көшірерсің...
Сезімге төзімменен қамал болған,
Жүрекпен өзіңе адал болған,
Бас тартып құмартқан сан арманнан,
Сендік болған әу баста жаралғаннан,
Сен мені не үшін кешірерсің?..