Өлеңдер ✍️

  22.02.2022
  205


Автор: Ақберен Елгезек

КАЛЕЙДОСКОП

Жаратқан соң желді әнші қып,
Бұрала билер тал шыбық.
Қиялмен Көкте гүл өсер,
Қара Жерден қар шығып!..
Тілесең,
жауап – сұрақ боп,
денеңе ауа тұрақ боп;
әуелеп ұшқан аппақ күй
сылдырай ағар бұлақ боп;
қол созым мекен – жырақ боп;
құм мен тас кетер құрақ боп;
қара да қара түнегің
құбылар көкшіл шуақ боп...
Қаласаң,
сөзің – зат болып;
сеніскен досың жат болып;
қатпар да қатпар мұздықтар
алаулап жанар от болып;
құл дегенің – Бек болып;
бар дегенің – жоқ болып;
мінезден – көк ит,
ұяттан
ұлып бір берер көкбөрі!..
 Аңсасаң,
уақыт іркіліп,
Ажалдан шығар нұр күліп;
Басыңа төгер жақұт тас,
Бақ құсы қалса сілкініп;
(Айтып та айтпай не керек)
Аспаннан әуез себелеп,
Тұрған кезде елжіреп,
Аңқиған адал аузыңнан
аңқ етіп ұшар көбелек!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу