Өлеңдер ✍️

  10.02.2022
  105


Автор: Светқали Нұржан

Майханада

Хунгария — Кечкеметтің шарабын
Мақтап маған ұсынасың, қарағым.
Тамыр үшін; мың жыл бұрын үзілген
Тап осыны тауысатын бар әлім.
Тамырымда тулап бағзы ақса қан,
Қан көзіне түспесе егер шөп-шалам —
Петефилер мұртын малған шараптан
Бүгін менің тартынатын жоқ шамам.
Мұны ішкесін он бойымда жын ойнап,
Рюмканы сындырам да гүл-оймақ —
Жыр семсерді — қалған кеше Шандордан
Суырып ап жауға ұрынам "құдайлап".
Бұлт - қара құс қанаттарын жазды өктем —
Осыны айтып жылап өтті қаз көктен...
...Қарындасым, неге күлдің сөзіме,
Петефиден менің жауым аз деп пе ең?!.
Хунгария — Кечкеметтің шарабын
Тағы да бір құйып жібер, қарағым!
Шараппенен біте мұңның аранын,
Біздің бастан өткен талай қара күн.
Ай көзеден нұр төгілсе жұтты іңір,
Сол бір нұрдан жанданады түкті қыр.
Түкті қырдың аспандатқан атағын —
Аз халықтың ақындары мықты кіл.
Ақындардың айтқан сөзін ел ұйып
Тыңдар болса — жасар ек-ау Жерұйық...
Әне, мені атарына оғы жоқ
Басқыншылар қаптап отыр мөлиіп.
Қарындасым! —
"Байқа, ағасы," — деймісің?
Айналайын көздеріңнен ойлы шын.
Өзің барсың жарақатым таңатын, —
Ту сыртымнан қанжар ұрсын, мейлі, сұм.
Тамырласым!
Тағы шарап құй маған!
Болмай-ақ қой мендегі осы күйге алаң.
Басқыншылар ұрпағы отыр төріңде —
Пақырларға даласын да қимаған!
Ақындарға моласын да қимаған!
Көк ұлдары — перзенттері Ұмайдың
Кәріне ылғи тап болыпты құдайдың.
Кеткен кеше Шандор құсап моласыз
Қыршындардың құнын кімнен сұраймын?..
"Қызыңқырап қалдыңыз-ау, аға сіз...
Және жалғыз жүрсіз, — дейсің, — жорасыз"
Ғазилардан әулие емен, көп болса
Қалам мен де, бәлкім, бассыз, моласыз.
Өлекселер өріп жүрген тұл қала...
Өзегімді кетеді өртеп мұң-нала —
Сол ерлердің арттарынан ақырып
Тендік сұрар, тумады деп бір бала!..

Көз ашпаған дүре мен оқ, тепкіден,
Елім үшін мен басымды көп тігем.
Кекке малып жыр тудыра алмасам —
Кетпен алып кеткенім жөн деп білем!..
Қош, қарындас! —
Ой түйгенді көз көрсін,
Әлі талай мылтығымен көздер сұм.
Оңашада ойланарсың, болмаса
Қызып айтқан нәйеті бір сөз дерсің.
"Қош, ағатай! —
Ел-жұртыңның ары үшін, — дедің қалқам, —
аман жүргін, арысым!.."
...Мен маскүнем боп кетер ме ем,
Күнде өстіп
Оята алсам бір қыпшақтың намысын?!.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу