👈 қаріп өлшемі 👉

  24.01.2022
  179


Автор: Жаңа заман ертегілері

Сезімтал тарақандар

Тарақандардың жолда топ-тобымен жортып келе жатқанын көрген қоңыздың екі көзі шарасынан шықты. Себебі өң-түссіз жәндіктер алды-артына қарамастан, үреймен шығысқа қарай жол тартып келеді. Таза ауада ерігіп әндетіп отырған қоңызға тарақандардың бұл әрекеті ерсі көрінді. Ол дереу не болғанын білгісі келді. Алайда ебін таппады. Егер сұрай қалсам, топырлап келе жатқан тарақандардың аяғының астына қалып жарақат алармын деп қауіптенді. Дегенмен сырттарынан бақылауын тоқтатпады. Жәндіктердің тоқтап демалатын сәтін аңдыды. Шаруасы түгел қоңыз тарақандардың жүдеу қалпын байқады. Енді қоңыздың оларға жаны ашыды. Ол тарақандардың соңынан еріп жүріп, қалайша 3 сағаттай жер жүргенін байқамай қалды. Қоңыздың қарны ашты. Тарақандар тынығып, азықтанып отырғанда жайлап басып жандарына келді.


тарақан сурет
– Әй, бұл кім тағы, жердің астынан шыға келген? – деді қарт тарақан жақтырмаған түрмен қарап.
– Қоңыз әулетіненмін, атым Жедел. Сіздердің туысқаныңыз боламын, – деп күмілжіді.
Қоңыз өзін толғандырған сұрағын қоя алмады. Өйткені ол қатты шаршаған еді.
Бұл оның өмірінде бірінші рет тоқтаусыз ұзақ жүруі болатын.
– Осы тұрған жеріңде күл-паршаңды шығарайын ба? – деп, манағы қарт тарақан мұртын әрлі-берлі қимылдатты.
– Бұл біздің – бауырымыз ғой. Бізге жаны ашып тұрған шығар. Әйтеуір түрінен бірдеңе сұрағысы келгені көрініп тұр, – деді буыны бекімеген жас тарақан. Сөйтті де ол дорбасындағы нанның қалдығын шығарып, асай бастады.
– Менің сіздерге қояйын деген сұрағым бар, – деді қоңыз. – Не себептен тобыңызбен көшіп барасыздар? Қайда барасыздар?
Қоңыздың ойлы көзбен қойған сұрағын байқаған қарт тарақанның жүзі жылыды.
Ол қоңыздың қасына келіп, бауырына басты да, ашылып әңгімесін жалғады.
– Біз адамдарға өкпеліміз. Қазақстанда ұялы телефон деген пәле көбейді. Ал біз оның радиациялық сәулесін өте жақсы сезінеміз. Осы жерді мекендеген миллиондаған бауырымыз қиналды, азап көрді. Адам баласы оны сезбейді де.
Мақсатымыз Қытайға барып тұрақтап қалу емес. Ол жерде ұялы телефон Қазақстаннан да көп екен. Біз Шың елінің Юймынь деген қаласы маңына жеткен соң, оңтүстікке қарай жол тартамыз. Гонконг деген қалада кемеге отырып, Тынық мұхитындағы Тубуаи деген аралға барып қоныстануды армандаймыз.
– Неге дәл сол жерге барасыздар? Бұл дегеніңіз жердің түбі ғой.
– Баруымыз міндет. Ұлы қоңыр түсті Тарақан әулетін сақтап қалуымыз керек.
Ол жерде ұялы телефон санаулы-ақ. Адам аз қоныстанған. Біз адам тұрған мекенге емес, адам аяғы баспаған жерге бармақпыз.
– Мәссаған! Ал осының бәрін сіз қалай білесіз, қалайша жоспарлап қойғансыз?
Осы кезде ұшып бара жатқан көгершін қарт тарақанның алдына сәлемдеме хатын тастап өтті. Тарақан құсқа алғысын айтты. Хатты Юймыньдегі көгершіндер эстафета арқылы жеткізіп беріпті. Конвертті ашып, қолына микрофон алды да, хаттағы жазуды бүкіл тарақандарға дауыстап оқыды.
«Сәлеметсіз бе, Бәдір! Қалайсыздар?
Әлемдегі миллиардқа жуық қоңыр түсті бауырларыңыз сіздерді асыға күтіп отыр. Менің ұйымдастыруыммен Тубуаи, Молден, Уполу, Аваруа аталатын аралдарға миллиондаған бауырларымыз сәтті қоныстанды. Сіздерді алдымен Юймыньдегі Датунхэ өзенінің солтүстік-батыс мекенінде күтіп аламыз. Датунхэ өзенінде өзім қолмен жасаған алып кемеге отырамыз да, Хуанхэ, Дадухэ, Янцзы, Бейпаньцзян, Сицзян өзендері арқылы Сянганға (Гонконг) жетеміз. Сянганда адам баласы құрастырған өте алып кемеге отырамыз. Ол кеме Австралияға қарай жүреді. Әрі қарай Австралиядан Понпей аралына өзіміздің кемемізбен барамыз.
Айтпақшы, Понпейге баруымыздың себебі – бұл жер Тубуаи, Молден, Уполу, Аваруаға қарағанда жақынырақ орналасқан. Әрі ол жерді қазір біздің қоңыр түсті әулетіміз мүлдем мекендемейді екен. Менің білуімше, осы жерде өмір сүруге барлық жағдай бар. Кеменің кестесін біліп алдым. Тура 12 күннен кейін Австралиядан Сянганға кеме келеді екен. Соған жету үшін алдымен сіздердің Юймынь маңындағы Датунхэ өзеніне 2 күннің ішінде келіп жетулеріңізді сұраймын. Азық-түлікке алаңдамаңыздар. Бәрін ойластырып қойдым. Сәлеммен ініңіз Қараш».
Хатты оқып болған қарт тарақан азықтанып болған жәндіктердің басын қосып, шығысқа қарай жүгіре жөнелісті.
«Қой үстіне бозторғай жұмыртқалаған» заманды аңсайтын тарақандарға қоңыз сәттілік тіледі.


фото тарақан таракан сурет



Нұрлан Құмар


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы