Өлеңдер ✍️

  22.01.2022
  117


Автор: Алма Түсіпбекова

Мұқағалидың күнделігінен

Кейде ғажап гүл өрем,
Кейде бұлттай түнерем.
Өзен сынды өмірде,
Бар жазғаным – бір өлең.
Сол өлеңде – шаттығым,
Басылмаған аптығым.
Сол өлеңнен сезілер,
Жан жылуы – жақсының.
Қарсы тұрар айбынға,
Сол өлеңде – қайғым да.
Мұнартқанда тауларым,
Мұңға құшақ жайдым да...
Жиғам арман керімін,
Сол өлеңде – сенімім.
Сеніміме телідім,
Ертеңімнің елігін.
Өзегінде - өктем үн,
Сол өлеңде - өткенім.
Ескі күннің елесі,
Өшпейді екен теп-тегін.
Жылағаным, күлгенім,
Құлағаным, жүргенім.
Жүрегімде жазылған,
Өлеңімде, бір менің.
... Кейде ғажап гүл өрем,
Кейде бұлттай түнерем.
Өзен сынды өмірде,
Бар жазғаным – бір өлең...




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу