Анекдот, әзілдер ✍️

Белгілі балалар жазушысы Құрманбай Толыбай (1926–2004) қос самайында ғана селдір шашы бар, жалтыр бас кісі болыпты. Сол кісі “Балдырған” журналында істеп жүрген кезде сатирик ақын Оспанхан Әубәкіров (1934–1986) анда-санда келіп, Құрекеңе еркелеп “бас жазуға” тиын-тебен алып кетіп тұрады екен.

Бірде Құрекең Оспанханға:

- Осы саған қашанғы мен тегін бере бермекпін ақшаны. Мықты болсаң, кәнеки, мені мақтап табан астында өлең шығар! – депті.

Сонда Осекең мүдірместен:

- Толыбаев Құрманбай,

Жомарттығы қандай!

Құрекеңнің басы –

Тұтасымен маңдай, –

деген екен.

“Саған дауа жоқ”, – деп Құрекең ақша іздеп, тағы да төс қалтасына қолын сала беріпті.