Өлеңдер ✍️

  16.01.2022
  100


Автор: Дәурен Айманбетов

Нөсерлі қаңтар

Қыс емес пе? Ендеше, жаумай ма қар,
Анау тауға өң беріп, баурайға бар.
Бәрінен де бақтағы талдарды айтшы,
Жамылмаса ақ көрпе жаурайды олар!

Қазір қаңтар, жауып тұр жаңбыр неге?
Күбірлеп тұр бақта анау тал бірдеңе.
Көз алмауда алжасқан аспан жақтан,
Дірілдеумен жалаңаш салбыр дене.

Қара желді, нөсерлі, күн тұманды,
Қақпас желің талдарды сілкіп алды.
Қолшатырсыз малмандай болған бақтың,
Көк тұман да сүйкеніп шырқын алды.

Сан бұтақтар жалына құдайға енді,
Соққан желден иіліп құлай берді.
Жапырағын үзсе де күз келгенде,
Жек көрмеген шығар-ау бұлай желді.

Қаңтар биыл осылай жаудай төнді,
Мұздай тамшы тоқтамай саулай берді.
Көк аспан-ау, көрпесін берші баудың,
Қыс емес пе, ақ қарың жаумай ма енді?!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу