Анекдот, әзілдер ✍️

Сырбай Мәуленов шығармашылық сапармен бірде Жамбыл облысын аралайды. Ол жақтағы жергілікті бір жас ақын Сырағаңды қолтығынан жетелеп, үйіне қонаққа апарады. Жас ақынның аздап кеудесінің желі бар ма, айтар сөзін ұйқаспен, өлеңмен айтуға тырысады екен. Сырағаңды төріне жайғастырған бойы, өзі де тізе түйістіріп отыра қалып:

– Сыраға, отырайық өлеңдетіп,

Әр жолын өлең сөздің көлемді етіп, –

деп сөз тастайды.

Сонда Сырағаң:

– Өлеңді жеңіл-желпі айта салып,

Бағасын не қыламыз төмендетіп, –

деп іле жауап береді. Әлгі жас ақын Сырағаңның осы сөзінен соң өлеңмен сөйлегенді сап қойыпты.