Өлеңдер ✍️

  11.01.2022
  88


Автор: Абдулмахмуд Пошатаев

Көшбасшыға

Ойпырмай- ай,
Неге жұртым қарғайды?!
Кейбіреуге жаны қайғы, мал қайғы.
Аңсап жүрген жұмағыңа ұл-қызың,
Ата-ананың тілегінсіз бармайды.
Тарих тағылым сырын бүгіп қалмайды.
Талай тасқа ұрған қазақ маңдайды.
Бодандықтан алып шыққан кісіні,
Жасы келді,
Жамандауға болмайды.
Киізіңді тіліп жүр ғой қонағың,
Білмейсің ғой гүлің қашан соларын.
Тіл тигізбе елін сүйген арысқа,
Алла білер алдыңда не боларын.
Бәрі епті,
Бәрі мықты, құдаймыз.
Қазақ едік, көнеміз-ау шыдаймыз.
Қонаевты аңсағандай еңіреп,
Бұл кісіні іздеп талай жылаймыз.
Аюды да жүгендеген астарлы.
Айдаһарды ақылменен басқарды.
Көрінгеннің айтағымен жүгірме,
Арандатып кәрі менен жастарды.
Елбасы ғой,
Елді солай қорғасын.
Сириядай соғыс бізде болмасын.
Елбасыдай адам тауып алыңдар,
Шауып алам деген жандар, ордасын.
Әрбіреуі илеуіне тасуда.
Шіренгендер шетел ауып, асуда.
Өз ұлты үшін бәрін қиған қазағым,
Атын дағы ауыстырмас асуда.
Саяси да жатырмыз біз жаңғырып.
Үріп жүрген ақылсыздар әңгүдік.
– Шал кет – дейсің саясатын түсінбей,
Ол кеткен соң, қалмайықшы қаңғырып.
Хатқа тізген осы міне ойларым.
Ниетім сол,
Ел бірлігін ойладым.
Елді бұзба,
Басбұзарлар, жетеді,
Теріс пыйғыл билеп алған бойларын.
Арандатса арам пыйғыл әртүрлі,
Адастырар қартымды да, халқымды.
Елдігінен адастырма елімді,
Қолда барда бағалайық алтынды.
Әруақ бар дегенге Сіз, сенесіз бе?
Жөн сілтеп,
Жөнін айтып бересіз бе?
– Не қасиет болды- деп ойлайсыздар,
– Мәшһүрдің шірімеген денесінде?
Бабалар, «Қасида» оқып жер астында,
Бүгінде шаһит болып ел астың ба?
Ойланшы,
Дүмшелердің күні қараң,
Уағызы жетектеп жер астына.
Қазақта, қанша ма «Ишан» ұлық өткен!
Бұл күнде сыр-аяқтың сыны кеткен.
Бүгінде, әсіре діншіл ұрпағың көп,
«Қанафи масқафыңның»- құны кеткен.
Көк бөрі,
Көкжал тірлік оралады.
Бүркіт боп жүрміз бүгін томағалы.
Томағасы шешілген қырандайын,
Түбінде бақытты күн оралады.
Тұлпарың оза шапса құнан деме.
Көп жандар бәле іздейді бұдан неге?
Оқ сөздер қадалса да, үндемейді,
Бізге сабыр бермеген, шыдам неге?
Елбасының таңдауы, баптағаны.
Осы кісі сенімді ақтар әлі.
Әке көрген оқ жонар, игі ісімен,
Тарихтың толтырады ақ парағын!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу