Өлеңдер ✍️

«Рас, ақіретке сенбегендер үшін күйзелтуші азап әзірледік» «Исра», 9-аят

Дейсің дәйім: «тегі асыл қазақ едік!
Көп халықтан бөлекше ғажап едік!»
Өмірге ғашық адам, өлімді айтса,
Аза бойың кетеді қаза болып.

Оқуға аят, хадис талпынбайсың.
Күні-түн кино көріп, ән тыңдайсың.
Жәннатқа шақырғанды жақтырмайсың,
Тозақтан қайтарғанға тоңқылдайсың.

Ажалдан момын құлда тіксіну жоқ.
Оны айтқанға сен жақтан тықсыру көп.
Құдай сүйген құл болсаң расында,
Әзірейілің келмей ме сұп-сұлу боп?

Қайтейін жаның таза, шыны болсаң,
Дін жайын бізден гөрі шын ұға алсаң?
Түйеқұстай басыңды құмға тығып,
Өлімді айтпай өмірді айт тірі қалсаң!..