Өлеңдер ✍️

Көктем келіп қалады-ау бүгін, ертең –
Таңғы ұйқыңнан ояндың күліп, еркем.
Сағым қуған баланың қиялындай
Сағындырған даланың гүлі көркем.
Таңғы ұйқыңнан ояндың, айым, күнім,
Жаман болмас менің де жайым бүгін.
Сен сияқты айналар кім сəбиін?
Мен сияқты аймалар қайыңды кім?..
Көктем келіп қалар-ау «Ұлы көшпен»,
Қайта көктеп, қайта еніп ғұмыр өшкен!
Жамыраған қозы-лақ көз алдымда,
Құлап-тұрған кетпейді құлын естен...
Құлыны едім мен де бір сол даланың,
Қонбады ма, қонды ма қолға бағым...
...Көктем келіп қалады-ау бүгін, ертең –
Көптен бері тартып жүр оң қабағым.