Өлеңдер ✍️

Алқара көк қандай əсем, айшықты?!:
Анам көмген таба нандай Ай шықты.
Ақ шабақтай шоршып қашқан қармақтан
Жұлдыздар да жамырады жан-жақтан.
Көкжиектің жонын сипап көмескі,
Əлдеқайдан əбеқоңыр леп есті.
Күміс теңге төгілгенде науадан,
Əтір исі аңқиды екен ауадан!
Сарықарын самауырда шəй қайнап,
Дастарқанға келіп қонды Ай жəйлап.
Толған Айға не жетеді күздегі?! –
Қонған Айға қолым создым үзгелі.
Көкте де Ай,
Жерде де Ай,
Екі Айға
Кезек-кезек қарағанмен не пайда?
Ай сəулесі жайлағалы жер үйді,
Көңіл шіркін сары майдай ериді.
…Алқара көк қандай əсем, айшықты?!.
Анам көмген таба нандай Ай шықты.