Өлеңдер ✍️

Ұшып бара жатқандай қалқып қана,
Қолында ма қос қанат?
Қолтықта ма?
Қолаң шашы төгiлген хордың қызын
Ей, дүние, үркiтпе, қорқытпа да!
Жүзiп бара жатқандай жəйлап қана,
Айдынға да көз тастап,
Айлаққа да.
Қасы-көзi қиылған қарағымды
Қарауылға қайтесiң байлап, бала?!
Ақ тамақты ару қыз, қара меңдi
Қай мекеннен адасып, дара келдi?
Қалтаңдаған қария,
Көкешiме,
Көзiң өтiп кетедi, қарама ендi!
Алдында – арман,
Аялсыз алдында Уақыт
Осы ма екен баянсыз балғын бақыт?
Сiлекейi шұбырған ей, Бозбала,
Неменеге сiлейiп қалдың қатып?
Асфальтыңыз айналып алақанға
Дəн тосқандай Көгершiн – балапанға.
Қауызына түсiрмей қара таңба
Сəуiрден гүл жетсе екен Саратанға…