Өлеңдер ✍️

Жазайын бір сәт дертін деп,
Жанымның сәл-пәл сыздаған.
Жексенбі болса желкілдеп,
Жетемін саған мұз ғалам.
​
Аяққа коньки байлап ап,
Қалықтап құстай заулаймын.
Сары аяз беттен аймалап,
Санамнан өшер таудай мұң.
​
Айнадай мұзы жылтырап,
Алдымда жатар ақ айдын.
Шығады будай бұрқырап,
Салқындау тері самайдың.
​
Шалқиды көңіл мұндайда,
Балқиды бойда қызып қан.
Батса да суық шымбайға,
Байқалмас әсте қызықтан.
​
Қиялға қанат бергендей,
Демалыс дейтін тәтті ұғым.
Айналып қайта келгендей,
Ақ қардай таза пәк күнім.

Ойнақтап қайтам құлындай,
Келсем де мұнда мың рет.
Пышақтың ғана қырындай,
Зырлайды мұзда құдірет.
​
Осылай бір күн өтті әйбәт,
Сенбессіз оған бәлки сіз!
Тағдырдың жолы көктайғақ,
Жүргенбіз қалай конькисіз?!

Үйренсең мұзда демеушің,
Шабасың аттай айқанат.
Тағдырдан таяқ жемеу үшін,
Таймайтын жерде тайғанап!