Әңгімелер ✍️

Бірде Қожанасыр кемпірі екеуі базарға барып, малын сатып келе жатқанда, ақшасын кемпіріне беріп қойыпты. Жолда екеуі келе жатса, кенеттен алдынан ұрылар шыға келіпті. Қожекеңнің жан-жағын тіміскілеп, ештеңе таба алмайды. Ұрылар бір кішкене шеңбер сызып, Қожанасырды тұрғызып:

— Егер осы шеңберден шықсаң, ұрып өлтіреміз, — депті де, кемпірді тонауға кірісіпті.

Кемпірдегі бар ақшаны алып, ұрылар жөніне кетіпті.

Кемпірі байғұс бөжілдеп, Қожекеңе ұрсып:

— Ой, қақбас шал, неңе мәз болып тұрдың мені тонап жатқанда? Бір жерде қақидың да қалдың ғой, — депті.

Сонда Қожекең тұрып:

— Тсс, мен оларды қатырдым, — депті.

— Әй, байғұс-ау, қалай қатырдың? — депті кемпірі.

Сонда Қожанасыр:

— Олар сені тонап жатқанда, мен аяғымды шеңберден шығарып тұра бердім, — депті.