Өлеңдер ✍️

Аман болсын, елім, жұртым Жаратқан,
Нұрын шашып әрбір атар әр ақ таң.
Сәттілігін сыйлай берсін әрбір күн,
Қуанышын беріп әрбір қанаттан.

Ауырғандар көп кешікпей жазылсын,
Іштей жейтін қайғы-мұңнан арылсын.
Ағайын туыс, дос-жарандар бір болып,
Сыйластықта қастарынан табылсын!

Бұл қазағым қонағына төр берген,
Ынтымақта жөн сұрасып тербелген.
Қиын сәтте қолдау беріп қашанда,
Бір-біріне жаны ашып дем берген.

Бұзылмасын қазақтықтың қаймағы,
Отбасының ұйып тұрған айраны.
Бауырмалдық арта берсін лайым,
Бір-біріне риясыз құшақ жайғаны.

Үлкен, кіші амандықта болайық,
Әрбір сәттен бақыт, шаттық табайық.
Өзге тілді жақтап "мәңгүрт" болғанша,
Қазақ тілді, қазақ болып қалайық!

Жібек Искакова